Greqia po përballet me një krizë të thelluar të ujit, teksa rezervat ujore sipërfaqësore dhe nëntokësore janë drejt shterimit, raportojnë sot mediat vendase, duke cituar një studim alarmues të “EAGME” – Studimi Helenik i Gjeologjisë dhe Eksplorimit të Mineraleve.

Sipas raportimit të së përditshmes “To Vima”, situata është përkeqësuar ndjeshëm nga tre faktorë kyç:
• Mbinxjerrja e ujit për bujqësi dhe turizëm
• Infrastruktura ujore e degraduar
• Mungesa e një strategjie të qartë kombëtare për menaxhimin e burimeve ujore

Studiuesit paralajmërojnë se shumë nga akuiferet nëntokësore – burime jetike që ofrojnë mbrojtje nga ndotja dhe avullimi – janë afër varfërimit total. Këto akuifere konsideroheshin si “rezerva strategjike” për Greqinë, por tashmë janë në rrezik serioz.

Zonat më të prekura

Kërcënimi më i madh për furnizimin me ujë po ndjehet veçanërisht në zonat turistike, të cilat përjetojnë rritje të ndjeshme të konsumit gjatë sezonit veror. Nën presion janë:
• Ishujt e Egjeut
• Rajoni i Halkidikit – Moudania dhe Kasandra
• Kreta, Peloponezi dhe ishujt Cikladikë

Në këto zona, uji i pijshëm është gjithnjë e më i pakët, ndërsa mungesa e reshjeve, si shi dhe borë, ka kontribuar në uljen e ndjeshme të burimeve natyrore.

Rreziku për ekonominë dhe mjedisin

Ekspertët paralajmërojnë se kriza mund të prekë seriozisht turizmin dhe bujqësinë, dy shtyllat kryesore të ekonomisë greke. Mungesa e ujit jo vetëm që kërcënon furnizimin për konsumatorët, por mund të sjellë edhe konflikte lokale për burimet.

Autoritetet pritet të shpallin masa emergjente, përfshirë racionimin e ujit, ndalimin e përdorimit të tepërt në bujqësi dhe sanksione për shpërdorim, ndërkohë që organizatat mjedisore kërkojnë masa urgjente për modernizimin e rrjetit të shpërndarjes dhe ruajtjen e burimeve natyrore.

Situata në Greqi vjen si pjesë e një trendi më të gjerë në Mesdheun Lindor, ku ndryshimet klimatike dhe mungesa e politikave afatgjata po kthejnë ujin në një resurs gjithnjë e më të rrallë dhe të çmuar.