Me nisjen e sezonit veror dhe rritjen e konsumit të energjisë, Operatori i Sistemit të Shpërndarjes (OSSH) ka intensifikuar kontrollet në zonat turistike, bregdetare dhe malore, për të luftuar abuzimet me energjinë elektrike dhe për të garantuar furnizim të qëndrueshëm për pushuesit dhe banorët.

Në një njoftim zyrtar, OSSH bën me dije se në kuadër të zbatimit të ligjit kundër informalitetit, janë kontrolluar rreth 1500 subjekte gjatë muajit të fundit. Nga këto kontrolle, janë identifikuar nëntë raste të rënda abuzimi, të cilat janë referuar Policisë së Shtetit për ndjekje penale, me akuzën “vjedhje të energjisë elektrike”.

Po ashtu, janë konstatuar 69 subjekte të tarifuar në kundërshtim me rregullat e Entit Rregullator të Energjisë (ERE), përkatësisht në klasifikimin sipas llojit të aktivitetit ekonomik.

Rreth 3 milionë kilovat-orë (kWh) janë rikuperuar përmes këtyre masave, dhe energjia e abuzuar i është faturuar të gjithë subjekteve përkatëse.

OSSH apelon fuqishëm ndaj të gjithë klientëve dhe bizneseve të mos bien pre e skemave mashtruese, si ndërhyrje në matës apo lidhje të paligjshme jashtë sistemit të matjes, pasi pasojat ligjore janë të rënda dhe nuk do të ketë asnjë kompromis për shkelësit.

Në këtë periudhë kulmore për turizmin, garantimi i një sistemi energjetik të pastër dhe funksional është prioritet i lartë, thekson OSSH, duke paralajmëruar se kontrollet do të vijojnë në të gjithë territorin.