Shefi i organizimit në Partinë Demokratike, Klevis Balliu, ka denoncuar publikisht atë që e quan një tjetër skandal elektoral të Partisë Socialiste, duke akuzuar organet e drejtësisë për mbulim të krimit zgjedhor dhe fshirje të provave nga dosja hetimore.

Në një deklaratë për mediat, Balliu u ndal te një rast konkret në zonën e Yzberishtit, ku sipas tij, një zyrë elektorale e PS-së është maskuar si lokal, ndërkohë që vetë administratori i pallatit ka konfirmuar se ajo është përdorur për qëllime zgjedhore.

“Zyra u denoncua prej meje më 11 maj, dhe pamjet e publikuara e tregojnë qartë funksionin e saj elektoral. Por ajo që është edhe më e rëndë është fshirja e dëshmisë së administratorit nga dokumentet hetimore, një përpjekje për të **zhdukur provat dhe për të mbuluar paligjshmërinë,” – tha Balliu.

Ai akuzoi SPAK-un dhe Prokurorinë për mungesë vullneti në hetimin e krimeve zgjedhore, duke deklaruar se “institucionet e drejtësisë janë vënë në shërbim të krimit elektoral, duke ndjekur jo autorët, por denoncuesit e tyre.”

Balliu theksoi se PD ka prova të qarta për krime zgjedhore, por pavarësisht kësaj, “drejtësia e kapur zbaton standarde të dyfishta, në varësi të interesave politike”.

Sipas tij, rasti i Yzberishtit nuk është i vetmi dhe PD do të vazhdojë denoncimin e këtyre rasteve “pavarësisht presioneve apo tentativave për t’i heshtur zërat kritikë”.

“Krimi elektoral i PS është dokumentuar. Ajo që mbetet është një sistem drejtësie që refuzon të veprojë, duke **mbrojtur paligjshmërinë dhe deformimin e votës së qytetarëve shqiptarë,” përfundoi Balliu.