Një aksident rrugor është regjistruar pasditen e sotme në aksin nacional Sarandë–Delvinë, në vendin e quajtur Shijan, ku dy automjete janë përplasur mes tyre, duke shkaktuar katër të plagosur.

Sipas burimeve paraprake, në aksident janë përfshirë një automjet tip Ford me targë AA240GE, i drejtuar nga Leonard Begolli, 64 vjeç, dhe një Benz me targë AB896TC, në pronësi të Alen Preçit. Si pasojë e përplasjes, kanë mbetur të plagosur katër persona, përfshirë edhe dy drejtuesit e automjeteve.

Të plagosurit janë transportuar me urgjencë në spitalin e Sarandës, ku ndodhen jashtë rrezikut për jetën, sipas mjekëve.

Në vendngjarje kanë mbërritur menjëherë shërbimet e Qarkullimit Rrugor të Sarandës, të cilët po punojnë për zbardhjen e plotë të rrethanave të aksidentit. Deri më tani, shkaku i ngjarjes mbetet i paqartë, por hetimet janë në vijim.