Melburn, 8 korrik 2025 – Një ngjarje tronditëse që ka trullosur opinionin publik australian ka marrë një kthesë të rëndësishme, pasi Erin Patterson, 50 vjeç, është shpallur fajtore për vrasjen e tre të afërmve të ish-bashkëshortit të saj, të cilëve u kishte shërbyer qëllimisht një vakt me kërpudha vdekjeprurëse.

Pas gjashtë ditësh diskutimesh dhe një procesi gjyqësor 9-javor në Gjykatën e Lartë të shtetit të Viktorias, juria e cilësoi Patterson fajtore për vrasje me dashje. Dënimi pritet të shpallet në një seancë të ardhshme, ndërsa ajo përballet me burgim të përjetshëm.

Darka që u kthye në tragjedi

Ngjarja daton në korrik të vitit 2023, në qytetin Morwell, 150 km në lindje të Melburnit. Patterson, nënë e dy fëmijëve, kishte organizuar një drekë familjare, duke ftuar ish-bashkëshortin Simon Patterson, si dhe prindërit dhe xhaxhallarët e tij. Simon e refuzoi ftesën, por Don dhe Gail Patterson (prindërit e tij), si dhe Heather dhe Ian Wilkinson (xhaxhai dhe halla), morën pjesë.

Për drekë, Erin kishte përgatitur një pjatë tradicionale Beef Wellington, ku në vend të kërpudhave të zakonshme kishte përdorur llojin ekstremisht helmues Amanita phalloides, të njohura si “kërpudhat e vdekjes”. Tre prej të ftuarve humbën jetën pas një jave vuajtjesh nga dështimi i organeve, ndërsa Ian Wilkinson mbijetoi për shkak se kishte konsumuar vetëm një sasi të vogël.

Provat rrëzuan alibinë

Fillimisht Patterson u mbrojt duke pretenduar se kishte qenë një aksident fatal, por provat teknologjike dhe analizat mjeko-ligjore rrëzuan mbrojtjen e saj. Në kompjuterin personal të saj u gjetën kërkime specifike për kërpudha helmuese, ndërsa dëshmitarë thanë se ajo kishte inskenuar një situatë të rreme emocionale gjatë darkës, duke pretenduar se ishte diagnostikuar me kancer, gjë që rezultoi e pavërtetë.

Mediat e përshkruan Patterson si një grua të ftohtë dhe manipuluese, ndërsa ky rast u pagëzua nga titujt kryesorë si “gjyqi i shekullit për kërpudhat”.

Çfarë pritet tani?

Me shpalljen fajtor, Erin Patterson ka 28 ditë kohë për të paraqitur apel, ndërsa vendimi për masën e dënimit do të merret nga gjykata në një seancë të ardhshme.

Ngjarja ka rikthyer vëmendjen ndaj sigurisë ushqimore, por edhe tek problematikat sociale që lidhen me konfliktet familjare të pazgjidhura. Pavarësisht se motivi nuk është bërë zyrtarisht publik, hetuesit nënvizojnë se tensionet për kujdestarinë e fëmijëve mes Patterson dhe ish-bashkëshortit të saj mund të kenë luajtur një rol kyç.

Rasti i Erin Patterson mbetet një prej më të rëndëve në historinë e krimeve familjare në Australi dhe do të pasohet nga një valë reflektimesh mbi besimin, hakmarrjen dhe drejtësinë.