Lajmi për ndalimin e reperit të njohur Rigels Rajku, i njohur si Noizy, në Zvicër ka bërë jehonë të menjëhershme në median shqiptare dhe atë ndërkombëtare. Sipas raportimeve nga mediat lokale në Zyrih, ndalimi është kryer me urdhër të Zyrës së Prokurorit Publik për Krime të Rënda dhe të Dhunshme — një fakt që ka ngritur pikëpyetje dhe shqetësim në opinionin publik.

Megjithatë, ekipi menaxherial i artistit ka ofruar një version të ndryshëm të ngjarjes, duke e cilësuar si një keqkuptim të natyrës administrative. Në një deklaratë për Revista Class, përfaqësues të afërt të reperit theksojnë se “situata nuk ka të bëjë me asnjë hetim penal, por me një çështje teknike, që është tashmë në proces sqarimi”.

“Të gjithë jemi të habitur dhe të zhgënjyer nga mënyra si ndodhi kjo,” u shprehën burime pranë artistit, duke nënvizuar se Noizy nuk ka pasur asnjëherë probleme të mëparshme me ligjin në Zvicër.

Sakaq, janë përgënjeshtruar edhe aludimet për një përplasje me ndonjë personazh të njohur të rrjeteve sociale, të cilat u përhapën në rrjet menjëherë pas lajmit për ndalimin. Menaxheri, familja dhe rrethi i ngushtë i artistit kanë konfirmuar se reperi nuk ka qenë i përfshirë në asnjë konflikt publik apo personal që mund të ketë shkaktuar këtë situatë.

Aktualisht, mbetet për t’u parë se çfarë do të nxjerrë zyrtarisht sqarimi i autoriteteve zvicerane. Një gjë është e sigurt: ndalimi i një prej figurave më të njohura të muzikës shqiptare jashtë vendit nuk kalon pa lënë gjurmë.