Kryeministri Edi Rama ka komentuar sot në një video live nga makina aksionin e ndërmarrë në Vlorë për lirimin e hapësirave publike, duke paralajmëruar se i njëjti model do të zbatohet në të gjithë qytetet e mëdha të vendit.

“Siç bëmë në Vlorë, do bëjmë në Tiranë, në Fier, Durrës, Shkodër”, deklaroi Rama, duke shtuar se këto qytete “kanë marrë hov të madh dhe do përballen me sfida të reja”, ndaj nevojitet veprim i prerë kundër abuzimit me hapësirat publike.

Gjatë deklaratës së tij, kreu i qeverisë kritikoi ashpër autoritetet lokale të Vlorës për mungesën e ujit të pijshëm, duke e quajtur këtë situatë “të pafalshme”. “Është e papranueshme që Vlora, me gjithë investimet që janë bërë, të mos ketë ende ujë të pijshëm për qytetarët,” tha ai.

Në një tjetër moment të fjalës së tij, Rama ndaloi edhe te zhvillimet në Theth, ku e quajti “plagë të tmerrshme” situatën me ndërtimet pa leje. Ai akuzoi një prokurore dhe Prokurorinë e Shkodrës për pengim të punës së shtetit dhe mbrojtje të paligjshmërisë. “Ministria e Drejtësisë po përgatit dokumentacionin për të kërkuar nga Këshilli i Lartë i Prokurorisë të vërë në vëzhgim të posaçëm Prokurorinë e Shkodrës,” theksoi Rama.

Deklaratat vijnë në një moment kur qeveria po intensifikon operacionet për lirimin e hapësirave publike, veçanërisht në zonat bregdetare, mes reagimeve të forta nga qytetarë dhe biznesmenë të prekur.