Një ngjarje e rëndë me nota heroike ka tronditur këtë të martë Shkodrën. Arben Alamani, 51 vjeç, kapiten i anijes turistike të Bashkisë, ka humbur jetën në ujërat e liqenit pasi u hodh për të shpëtuar dy turistë të huaj që po mbyteshin.

Ngjarja ndodhi rreth orës 16:32, gjatë një lundrimi të zakonshëm me turistë në liqenin e Shkodrës. Dy turistë dyshohet se ranë aksidentalisht në ujë, dhe pa hezituar, kapiteni Alamani është futur menjëherë për t’u ardhur në ndihmë.

Me guxim dhe përkushtim të rrallë, ai ia doli t’i nxjerrë të dy të huajt të gjallë, duke shmangur një tragjedi edhe më të madhe. Por, për fat të keq, vetë kapiteni nuk arriti të dilte i gjallë nga uji. Dyshohet se mund të jetë rraskapitur gjatë përpjekjes për shpëtim ose ka pësuar arrest kardiak pas daljes nga uji.

Autoritetet vendore kanë reaguar menjëherë pas ngjarjes, duke vlerësuar veprimin e tij si një akt të lartë trimërie dhe sakrifice. Policia po punon për të sqaruar rrethanat e plota të ngjarjes, ndërkohë që komuniteti dhe të afërmit janë të tronditur nga humbja e një njeriu që vuri jetën në rrezik për të shpëtuar të tjerët.

Arben Alamani po kujtohet sot si një hero i vërtetë i Shkodrës.