Policia e Durrësit ka vënë në pranga Behar Gergurin, 39 vjeç, banues në këtë qytet, i cili ishte shpallur në kërkim ndërkombëtar nga autoritetet italiane.

Sipas njoftimit zyrtar, Gerguri ishte dënuar nga Gjykata e Apelit e Milanos në vitin 2023 me 5 vite e 2 muaj burgim, për veprën penale “Trafikim i lëndëve narkotike”, sipas legjislacionit penal italian.

Arrestimi i tij u realizua si pjesë e bashkëpunimit ndërkombëtar të policisë shqiptare me Interpolin dhe autoritetet italiane.

Aktualisht janë duke u ndjekur procedurat ligjore për ekstradimin e tij drejt Italisë, ku ai do të vuajë dënimin e dhënë nga drejtësia italiane.

Ky rast vjen në kuadër të përpjekjeve të vazhdueshme për kapjen e shtetasve shqiptarë të përfshirë në veprimtari kriminale ndërkombëtare.