Një tragjedi e rëndë ka ndodhur në shtetin perëndimor të Gujaratit në Indi, ku të paktën 9 persona kanë humbur jetën dhe 5 të tjerë janë plagosur, pasi një pjesë e një ure u shemb, duke bërë që disa automjete të bien në lumin Mahisagar, në zonën e Vadodaras.
Sipas zyrtarit të lartë civil Anil Dhameliya, ngjarja ndodhi mëngjesin e sotëm dhe menjëherë janë aktivizuar operacionet e kërkim-shpëtimit.
“Automjetet ranë në lumë dhe deri tani janë gjetur 9 trupa. Po bëjmë përpjekje maksimale për të minimizuar humbjet njerëzore,” deklaroi Dhameliya.
Autoritetet lokale nuk kanë dhënë ende një arsye të saktë për shembjen e urës, ndërsa ekipi hetimor po punon për të zbuluar shkakun. Operacionet e shpëtimit vazhdojnë, ndërsa ekziston frika se numri i viktimave mund të rritet.
Ngjarja ka ngritur sërish shqetësime mbi gjendjen e infrastrukturës në disa rajone të Indisë, veçanërisht në zonat rurale, ku mirëmbajtja e urave dhe rrugëve shpesh është e pamjaftueshme.
