Këngëtarja e njohur nga Zelanda e Re, Lorde, ka bërë një rrëfim prekës mbi një fazë të vështirë të jetës së saj, që sipas saj i erdhi shumë pranë vendimit për të braktisur muzikën. Në një intervistë për BBC Radio 1 me Jack Saunders, 28-vjeçarja foli për izolimin emocional dhe obsesionin me peshën trupore që e kishte larguar nga krijimtaria.

“Ndihesha bosh dhe pa asnjë ide. Çdo gjë që më kalonte nëpër mend kishte të bënte me peshën, ushqimin dhe stërvitjen. Ishte një fiksim që më paralizoi krejtësisht,” – u shpreh ajo.

Lorde pranoi se për një kohë të gjatë kishte hequr dorë nga muzika në mendjen e saj, duke e parë atë si një kapitull të mbyllur. Por gjithçka ndryshoi kur vendosi të çlirohej nga presionet e jashtme dhe vetëkritika toksike.

“Sapo lashë pas këtë mënyrë të jetuari, muzika nisi të kthehej natyrshëm tek unë.”

Rikthimi i saj u bë i dukshëm me një performancë të befasishme në festivalin Glastonbury, ku u ngjit në skenë në një set të fshehtë, duke emocionuar fansat dhe konfirmuar kthimin e saj në muzikë.

Lorde sapo ka publikuar albumin e saj të katërt, të titulluar “Virgin”, më 27 qershor. Kopertina provokuese, e cila paraqet një rreze-X të legenit të një gruaje me një pajisje intrauterine (IUD), ka ngjallur debate të shumta në rrjetet sociale – për disa një simbol i fuqishëm i kontrollit mbi trupin, për të tjerë një zgjedhje kontestuese.

Në jetën personale, Lorde duket se ka gjetur qetësinë pranë Jim-E Stack, producent dhe DJ me të cilin është parë publikisht në Glastonbury dhe Londër. Pas një periudhe heshtjeje dhe pasigurie, artistja duket më e vendosur se kurrë për të vijuar rrugën e saj në muzikë – këtë herë, pa kompromise me veten.