Gjykata e Posaçme e Apelit për Korrupsionin dhe Krimin e Organizuar ka lënë në fuqi vendimin e Shkallës së Parë për çështjen ndaj një grupi të akuzuarish për veprimtari të rënda kriminale, mes të cilëve edhe Gjergj Cukali, i dënuar me 25 vite burg. Ky vendim u konfirmua të mërkurën më 9 korrik 2025, me disa ndryshime për disa prej të pandehurve.

Cukali, i njohur edhe si mik i Emiljano Shullazit, akuzohet për vendosjen e lëndës plasëse në automjetin e biznesmenit Gjon Mena, një akt që për prokurorinë ka qenë pjesë e një aktiviteti kriminal të organizuar.

Ndërkohë, një nga të pandehurit, E.J., përfitoi ulje dënimi në 7 vite burg pas pranimit si bashkëpunëtor i drejtësisë, në aplikim të nenit 28/7 të Kodit Penal.

Po ashtu, i pandehuri B.D. u dënua me 18 vite burg për tentativë vrasjeje me dashje, kryer në kuadër të një grupi të strukturuar kriminal, në dëm të shtetasit A.B. Gjykata bashkoi dënimet e tij në një të vetëm prej 18 vitesh, në zbatim të nenit 55 të Kodit Penal.

Gjykata vendosi gjithashtu që shpenzimet gjyqësore t’u ngarkohen solidarisht të pandehurve dhe informoi se vendimi mund të ankimohet në Gjykatën e Lartë brenda 45 ditëve nga dita e shpalljes së vendimit të arsyetuar.

Trupi gjykues përbëhej nga gjyqtarët Tereza Merkaj (kryesuese), Engert Pëllumbi dhe Igerta Hysi, ndërsa çështja kishte numrin e regjistrimit 14 akti, datë 21.01.2025.

Ky është një ndër rastet më të rëndësishme të ndjekura nga GJKKO për vitin 2025, që synon të godasë veprimtarinë kriminale dhe lidhjet mes grupeve të strukturuara dhe individëve me ndikim në botën e krimit në Shqipëri.