Një ngjarje e rëndë është shënuar mbrëmjen e së enjtes në lagjen “Uji i Ftohtë” në Vlorë, ku një konflikt mes dy qytetarëve ka përfunduar me plagosjen e rëndë të njërit prej tyre.

Ngjarja ndodhi rreth orës 23:30, pranë vendit të njohur si “Rrapi”, në një lokal, ku si pasojë e një sherri për motive të dobëta, 64-vjeçari Besnik Gjondeda goditi me thikë në pjesën anësore të kraharorit shtetasin G. V., 56 vjeç.

Falë ndërhyrjes së menjëhershme të strukturave të DVP Vlorë dhe shërbimeve të Komisariatit të Policisë, autori u kap dhe u arrestua në flagrancë, duke parandaluar përshkallëzimin e situatës. Viktima u transportua me urgjencë në Spitalin Rajonal të Vlorës, ku mjekët konfirmojnë se ndodhet jashtë rrezikut për jetën.

Ndaj autorit të dyshuar, Besnik Gjondeda, rëndojnë akuzat për “Plagosje e rëndë me dashje” dhe “Prodhim, mbajtje apo shitje pa leje e armëve të ftohta”.

Policia njofton se materialet hetimore i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë për veprime të mëtejshme.

Hetimet vijojnë për të zbardhur plotësisht rrethanat e ngjarjes.