Në një lidhje të drejtpërdrejtë për emisionin FIVE në RTV Dukagjini, Leonard Ademaj, vëllai i Liridona Ademajt, ka reaguar pas publikimit të raportit të Institutit të Psikiatrisë Forenzike, ku vërtetohet se Naim Murseli nuk ka të meta mendore.

Leonardi u shpreh se për familjen kjo periudhë ka qenë tepër e rëndë, por raporti vetëm sa ka konfirmuar bindjen e tyre të hershme:

“Naimi këtë e kishte si kartë të fundit me të cilën mund ta zvarriste procesin gjyqësor. Po besoj se Prokuroria dhe Gjykata do ta marrin si të tillë këtë çështje dhe do të vazhdojnë me procesin, pa lejuar më që ai të zvarritet”.

Ai ritheksoi edhe një herë qëndrimin e familjes, duke e cilësuar Naim Murselin si organizatorin kryesor të vrasjes së Liridona Ademajt, së bashku me Kushtrim Kokallën, ndërsa ekzekutori është Granit Plava.

“Të tre së bashku kanë ndërmarrë një veprimtari kriminale duke e vrarë Liridonën”, tha ai, duke shtuar se familja pret një proces të drejtë dhe pa vonesa.

Seanca gjyqësore për këtë rast pritet të mbahet të hënën e ardhshme, ndërsa Leonard Ademaj kërkoi që drejtësia të veprojë me vendosmëri:

“Liridona nuk kthehet më, edhe nëse dënimi është maksimal. Por ajo që duam ne është që këta të dënohen dhe të japim një mësim për të gjithë ata që tentojnë të bëjnë diçka të tillë. Drejtësia duhet të jetë e prerë.”

Familja Ademaj shpreson që gjykata të mos tolerojë më asnjë përpjekje për zvarritje të procesit, dhe kërkon që ky rast të jetë një shembull i fortë për shoqërinë.