Gjykata e Posaçme Kundër Korrupsionit dhe Krimit të Organizuar (GJKKO) ka lënë në fuqi masën e arrestit me burg për 7 personat e arrestuar të premten gjatë një operacioni të gjerë të zhvilluar nga SPAK dhe strukturat e Policisë së Shtetit, në kuadër të një hetimi për një grup të strukturuar kriminal të përfshirë në trafik ndërkombëtar kokaine dhe korrupsion.

Të arrestuarit janë:
• Arjan Gjata
• Vilson Roçi
• Musa Gjikola
• Akil Alushi
• Jani Meçja
• Selami Lushkaj
• Erjon Dani – ish-efektiv i lartë i Policisë së Shtetit

Sipas hetimeve të SPAK, këta shtetas janë të dyshuar për trafikimin e rreth 3.8 ton kokainë, nga vendet e Amerikës Latine drejt vendeve të Bashkimit Evropian, si dhe për përfshirje në korrupsion aktiv ndaj funksionarëve publikë.

Në veçanti, ish-efektivi Erjon Dani dyshohet se ka abuzuar me aksesin në sistemin TIMS, duke nxjerrë të dhëna sensitive dhe duke i vënë në dispozicion të grupit kriminal, duke ndihmuar në shmangien e kontrolleve policore dhe ndjekjen e lëvizjeve të personave të interesit.

Gjatë operacionit u arrestua edhe një person i tetë në kushtet e flagrancës për armëmbajtje pa leje, i cili do të gjykohet veçmas në Gjykatën e Tiranës, pasi nuk ishte pjesë e hetimit të filluar nga SPAK.

Hetimet janë në vazhdim dhe burime nga organi i akuzës bëjnë me dije se 5 persona të tjerë janë në kërkim, ku dyshohet se 2 ndodhen në Dubai, ndërsa 3 të tjerë në vende të BE-së, mes tyre edhe organizatorë të dyshuar të rrjetit kriminal.

SPAK ka kërkuar bashkëpunim ndërkombëtar për identifikimin dhe ekstradimin e tyre. Ndërkohë, hetimet janë zgjeruar edhe për të identifikuar lidhje të mundshme me zyrtarë të përfshirë në mbështetje logjistike dhe penale të aktivitetit kriminal.