Një ngjarje e pazakontë është regjistruar në një lokal në lagjen nr. 17 të Durrësit, ku një konflikt verbal ka degraduar në dhunë të mundshme fizike. Falë ndërhyrjes së menjëhershme të Policisë së Durrësit, situata u neutralizua në kohë dhe u parandalua përshkallëzimi i saj.

Në pranga ka rënë shtetasi Ermal Dhampiraj, 44 vjeç, banues në Shkodër, i cili u kap në flagrancë teksa kanoste me sopatë dy persona, të identifikuar si E. A. dhe E. S., banues në Durrës. Dyshohet se konflikti ka pasur motive personale.

Policia bëri të ditur se mjeti prerës, sopata, është sekuestruar në cilësinë e provës materiale, ndërsa ndaj Dhampirajt është ngritur akuza për “Kanosje” dhe “Mbajtje pa leje e armëve të ftohta”.

Ndërkohë është proceduar penalisht edhe shtetasi B. K., i cili, sipas hetimeve paraprake, kishte dijeni për konfliktin, por nuk kishte njoftuar autoritetet, duke shkelur detyrimet ligjore të kallëzimit.

Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.