Një zjarr i përmasave të konsiderueshme ka rënë pak minuta më parë në zonën e njohur si “Ura e Daullasit” në Fier, duke shkaktuar panik tek banorët e zonës. Zjarri dyshohet se ka ardhur si pasojë e djegies së hamulloreve nga fermerët, por ka dalë jashtë kontrollit, duke përfshirë një sipërfaqe të madhe dhe duke u afruar rrezikshëm pranë shtyllave të energjisë elektrike.

Në vendngjarje kanë mbërritur shërbimet zjarrfikëse, të cilat po punojnë me intensitet për të neutralizuar flakët, të cilat po përhapen me shpejtësi për shkak të erës së fortë. Për të shmangur çdo rrezik të mundshëm për rrjetin elektrik, autoritetet kanë ndërprerë furnizimin me energji elektrike në zonë.

Zjarri ka rritur ndjeshëm shqetësimin e banorëve përreth, ndërsa zjarrfikësit vijojnë punën për vënien nën kontroll të flakëve dhe parandalimin e përhapjes së mëtejshme të tyre drejt zonave të banuara. Nuk raportohet për të lënduar deri në këtë moment.

Autoritetet kanë nisur hetimet për të identifikuar përgjegjësit e zjarrvënies dhe bëjnë thirrje për kujdes të shtuar, veçanërisht gjatë këtyre ditëve me temperatura të larta dhe rrezik të shtuar për zjarr.