Në një intervistë të sinqertë për podkastin e Alketa Vejsiut, reperi i njohur Ledri Vula ka folur për herë të parë hapur rreth ndarjes së tij me partneren dhe nënën e vajzës së tij, Sara Hoxha.

Ledri theksoi se ndarja nuk erdhi si pasojë e konflikteve apo mosmarrëveshjeve, por për shkak të distancës gjeografike që, me kalimin e kohës, i ftohu raportet mes tyre.

“Puna e Sarës ka qenë në Tiranë, puna jeme ka qenë në Kosovë dhe diasporë, dhe kjo ka krijuar një distancë që i ka ftoh raportet. Distanca e bëri ndarjen më të lehtë”, u shpreh ai me qetësi.

Pavarësisht kësaj, Ledri u tregua i kujdesshëm për të theksuar se ruajnë një marrëdhënie të mirë për hir të vajzës së tyre, Poem Blu, dhe se respekton zgjedhjet e Sarës në jetën private.

Ai komentoi gjithashtu lidhjen e saj të re me Erik Fullanin, duke u shprehur me një ton mbështetës:

“Sara më duket shumë e lumtur me djalin. Për mua është më e rëndësishme që Sara të jetë e lumtur. Nëse ajo është e lumtur, edhe goca është e lumtur. Për mua, goca është më shumë me rëndësi.”

Deklaratat e Ledrit janë pritur me interes të madh nga publiku, duke sjellë një dritë të re mbi marrëdhënien e tyre, tashmë të kaluar, por me respekt e përkushtim për rolin e përbashkët si prindër.