Një ngjarje e rëndë me armë ka ndodhur paraditen e së dielës në Lexington, Kentucky, ku një person i armatosur ka qëlluar një oficer policie pranë Aeroportit Blue Grass, përpara se të largohej dhe të hapte zjarr brenda një kishe në Richmond Road.

Sipas autoriteteve, sulmi filloi rreth orës 11:36 me orën lokale, kur autori qëlloi një oficer të Policisë Shtetërore të Kentucky-t (KSP). Oficeri i plagosur është transportuar me urgjencë në spital dhe ndodhet nën kujdes mjekësor.

Autori më pas u drejtua drejt Kishës Baptiste, ku ka plagosur disa persona të tjerë, përpara se të neutralizohej dhe të binte i vdekur brenda ambienteve të kishës nga forcat e Policisë së Shtetit dhe ato të Lexingtonit.

Guvernatori i Kentucky-t, Andy Beshear, konfirmoi lidhjen mes dy skenave të ngjarjes dhe u bëri thirrje qytetarëve të qëndrojnë të bashkuar:

“Oficeri dhe të plagosurit e tjerë po marrin trajtim mjekësor. Ju lutemi, lutuni për të gjithë të prekurit nga këto akte të pakuptimta dhune dhe falënderoni autoritetet për reagimin e shpejtë.”

Autoritetet nuk kanë dhënë ende një bilanc të saktë të të plagosurve, ndërsa hetimet për identitetin e autorit dhe motivet e mundshme po vijojnë intensivisht. Zona përreth kishës dhe aeroportit është rrethuar dhe forcat e rendit vijojnë punën në vendngjarje.