Një ngjarje tragjike ka ndodhur në bregdetin shqiptar, ku një i ri nga Kosova ka ndërruar jetë papritur teksa ndodhej me pushime.

Anid Samir Hoxha, 20 vjeç, banues në Rahovec, humbi jetën më 14 korrik 2025, në një nga plazhet e Dhërmiut, ndërsa po luante volejboll me shokët e tij.

Ngjarja ka ndodhur pranë fushës së volejbollit në bregdet, dhe sipas njoftimit zyrtar të Policisë së Shtetit, dyshohet se vdekja ka ardhur për shkaqe natyrale.

“Specialistët e Stacionit të Policisë Dhërmi referuan materiale për vlerësim, pasi më datë 14.07.2025, pranë një plazhi në Dhërmi, në fushën e volejbollit, dyshohet se ka humbur jetën për shkaqe natyrale shtetasi A. H., 20 vjeç, banues në Kosovë, i cili ndodhej me pushime së bashku me shoqërinë e tij,” thuhet në njoftimin e policisë.

Për të përcaktuar me saktësi shkakun e vdekjes, autoritetet kanë njoftuar se do të kryhet autopsia pranë Institutit të Mjekësisë Ligjore në Tiranë.

Vdekja e të riut ka tronditur familjen dhe miqtë e tij, ndërsa rrjetet sociale janë mbushur me mesazhe ngushëllimi dhe homazhe për humbjen e parakohshme të Anid Samir Hoxhës.