Ministria e Drejtësisë në Itali ka bërë të ditur një masë të re emergjente që synon lirimin me kusht ose me masa alternative të rreth 10,000 të burgosurve, për të përballuar krizën e mbipopullimit në sistemin penitenciar. Lajmi është konfirmuar nga agjencia ndërkombëtare e lajmeve Reuters.
Sipas planit, të drejtë për t’u liruar do të kenë personat që kanë më pak se dy vite dënim të mbetur, që kanë marrë një vendim gjyqësor përfundimtar dhe që nuk kanë kryer shkelje disiplinore në 12 muajt e fundit.
Nga kjo masë përjashtohen kategoritë e dënuarve për krime të rënda, si terrorizmi, krimi i organizuar, përdhunimi dhe trafikimi i migrantëve.
Italia është ndër vendet evropiane me nivelin më të lartë të mbipopullimit në burgje, me një normë mesatare zëniesh prej 122%, sipas statistikave më të fundit.
Vendimi i Ministrisë së Drejtësisë vjen në një kohë kur autoritetet po përballen me rritjen e vetëvrasjeve në burgje, përkeqësuar edhe nga temperaturat ekstreme të verës. Për këtë qëllim, është ngritur një task-forcë e posaçme e cila do të shqyrtojë rast pas rasti kandidatët për përfitim nga masat alternative dhe pritet të raportojë progresin e saj brenda muajit shtator.
Ky hap konsiderohet si një përpjekje urgjente për të sjellë lehtësim në një sistem që prej vitesh përballet me mungesë kapacitetesh dhe presion social gjithnjë në rritje.
