Një javë pas ngjarjes që tronditi zonën e Matit, detaje të reja zbardhin motivet e dyshuara pas vrasjes së Renis Dobrës, 23-vjeç, i cili u ekzekutua dhe më pas u hodh bashkë me automjetin në liqenin e Ulzës.

Sipas burimeve zyrtare nga policia, tre persona janë identifikuar si autorë të krimit: Aleksandër Bushgjokaj, Kristë (Kristi) Bushgjokaj dhe Fation Bushgjokaj. Dyshohet se vrasja u krye për shkak të prishjes së pazareve të drogës, të nisura vite më parë, kur Dobra punonte në Gjermani në shërbim të grupit kriminal të vëllezërve Bushgjokaj.

Hetimet e deritanishme tregojnë se viktima mund të jetë ekzekutuar në mënyrë makabre, ndërsa autorët janë përpjekur të zhdukin gjurmët duke e hedhur trupin e pajetë në liqen, së bashku me makinën.

Ngjarja ka shkaktuar tronditje të madhe tek familjarët e të riut. Motra e viktimës ka reaguar publikisht në rrjetet sociale, duke ndarë dhimbjen e thellë që po përjeton familja.

“Vetëm një vëlla kisha… dhe tani një plagë që s’mbyllet kurrë”, ka shkruar ajo në një postim në TikTok, duke prekur opinionin publik me fjalët e saj të ngarkuara me dhimbje.

Policia dhe prokuroria e Matit po vijojnë hetimet për dokumentimin e plotë të ngjarjes dhe zbardhjen e dinamikës së krimit, ndërsa autorët janë shpallur në kërkim. Autoritetet thonë se janë në ndjekje të disa provave të rëndësishme që mund të çojnë në arrestimet e tyre në ditët në vijim.