Situata e zjarreve në vend mbetet shqetësuese, me 32 vatra të raportuara gjatë 24 orëve të fundit, nga të cilat 9 mbeten ende aktive në disa qarqe të vendit. Vatrat janë evidentuar në bashkitë Dibër, Mat, Bulqizë, Mallakastër, Roskovec, Vlorë, Himarë, Tepelenë, Përmet, Kurbin, Mirditë, Elbasan, Korçë, Selenicë, Kavajë, Kamëz, Tiranë, Shijak, Krujë dhe Malësi e Madhe.

Aktualisht, më problematike paraqiten këto zona:
• Dibër (Parku Lurë-Mali i Dejës): Dy vatra zjarri në zonën “Liqeni i Luleve” dhe “Fusha e Pelave”. Ndërhyrja është e vështirë për shkak të terrenit të thyer malor.
• Bulqizë: Në Zerqan, mbi fshatin Krajkë, flakët po përparojnë në një zonë me dushqe dhe shkurre.
• Mat: Në zonën e mbrojtur të Zall-Gjoçajt (“Përroi i Zi”), një vatër po kërcënon pyllin me pisha dhe ah.
• Dovolan (Dibër): Zjarri është riaktivizuar dhe po përhapet drejt Pejkës dhe Drinit të Zi.
• Mallakastër: Në fshatin Belishovë, zjarri vijon të jetë aktiv dhe i pakontrolluar.
• Vlorë (Dukat): Është riaktivizuar një vatër në “Qafa e Shëngjergjit”, në majën e Paliskës. Ndërhyrja po bëhet nga toka dhe ajri.
• Tepelenë: Pranë fshatit Beçisht, zjarri po mbahet nën kontroll dhe monitorim të vazhdueshëm.
• Kurbin: Në Shkopet (Milot) janë djegur rreth 65 hektarë pyje. Pavarësisht përpjekjeve, izolimi i flakëve nuk është arritur.
• Elbasan/Librazhd: Në kufirin mes fshatrave Shmil dhe Gurakuq, zjarri ka përfshirë një pyll me gështenja.

Sipas raportimeve zyrtare, janë djegur mbi 90 hektarë sipërfaqe me bimësi, pyje dhe shkurre.

Forcat e angazhuara:
Në operacionet për shuarjen e zjarreve janë përfshirë:
• 44 automjete zjarrfikëse
• 620 forca operacionale nga zjarrfikësit vendorë dhe emergjencat civile
• 110 efektivë të Forcave të Armatosura
• 5 mjete zjarrfikëse ushtarake dhe 2 helikopterë.
Vetëm gjatë ditës së sotme janë përfshirë 167 ushtarakë, 21 automjete dhe 1 helikopter në operacionet e shuarjes.

Kushtet atmosferike dhe rreziku
Sipas IGJEUM, reshje nuk priten, ndërsa niveli i rrezikut për zjarre pyjore është i lartë në qarqet: Lezhë, Tiranë, Elbasan, Fier, Berat, Korçë dhe Gjirokastër. Në qarqet e tjera rreziku mbetet i moderuar.

Thirrje qytetarëve
Strukturat e mbrojtjes civile u bëjnë thirrje qytetarëve të tregojnë kujdes të shtuar dhe të raportojnë çdo vatër të dyshimtë ose zjarr aktiv pranë autoriteteve përkatëse për të shmangur përhapjen dhe pasojat e rënda.

Zjarret kanë përfshirë një pjesë të madhe të territorit dhe rrezikojnë mjedisin, sigurinë publike dhe jetën e komuniteteve në zonat malore e pyjore. Autoritetet vijojnë në gatishmëri të plotë.