Gaza – Tre kamionë me ilaçe dhe furnizime mjekësore do të hyjnë sot në Rripin e Gazës, nën kujdesin e Organizatës Botërore të Shëndetësisë (OBSH), sipas një njoftimi të publikuar nga Ministria Palestineze e Shëndetësisë e drejtuar nga Hamasi. Kamionët nuk përmbajnë ushqime, bëhet e ditur në deklaratën zyrtare të shpërndarë në platformën Telegram.

Ministria ka apeluar për mbrojtjen e konvojit gjatë rrugës drejt spitaleve, duke kërkuar bashkëpunim nga qytetarët, autoritetet lokale dhe palët e interesuara për të siguruar një mbërritje të sigurt të ndihmave. “Kontributi i tyre është thelbësor për shpëtimin e jetëve të të sëmurëve dhe të plagosurve,” thuhet në deklaratë.

Ndërkohë, tensionet në Gaza mbeten të larta. Ushtria izraelite (IDF) ka lëshuar një urdhër evakuimi për banorët e zonës jugperëndimore të Deir al-Balah, në përgatitje të një operacioni të gjerë tokësor, i pari i këtij lloji në këtë qytet që nga nisja e luftës.

Sipas një deklarate të publikuar në rrjetin X nga zëdhënësi i IDF për gjuhën arabe, Avichay Adraee, forcat izraelite synojnë të “shkatërrojnë aftësitë e armikut dhe infrastrukturën terroriste” në një zonë ku nuk kanë vepruar më parë.

Zhvillimet e fundit në Gaza vijnë mes përshkallëzimit të dhunës dhe krizës humanitare, ndërsa komuniteti ndërkombëtar vijon të kërkojë akses më të madh për ndihmat dhe mbrojtje për civilët.