Një grup veteranësh të Forcave Ajrore të SHBA kanë ngritur akuza të rënda ndaj qeverisë amerikane, duke pretenduar se janë prekur nga një “armik i padukshëm” gjatë shërbimit në bazën tepër sekrete Zona 51. Ata thonë se janë lënë të vdesin në heshtje, si pasojë e ekspozimit të paautorizuar ndaj rrezatimit në Poligonin e Testimit dhe Stërvitjes në Nevada (NTTR), një zonë ku më parë ishin kryer teste bërthamore.

Ish-rreshteri David Crete, i cili shërbeu në këtë bazë nga viti 1983 deri në 1987, deklaroi se mbi 490 kolegë të tij kanë humbur jetën nga sëmundje të rënda, kryesisht kancere, që nga përfundimi i detyrës në këtë zonë. Ai shtoi se shumë prej viktimave kanë ndërruar jetë para moshës 65 vjeç, ndërsa rasti më i ri i vdekjes ishte një pilot 33-vjeçar.

Pavarësisht pasojave të rënda shëndetësore, Departamenti Amerikan i Çështjeve të Veteranëve ka refuzuar të mbulojë trajtimin mjekësor të tyre, pasi nuk ka të dhëna të dokumentuara për ekspozimin ndaj rrezatimit – për shkak se të gjitha aktivitetet në NTTR ishin klasifikuar si “sekrete” dhe “të maskuara me të dhëna”.

Crete, i cili sot vuan nga atrofi cerebrale, dëshmoi para Komitetit të Çështjeve të Veteranëve të Dhomës së Përfaqësuesve në prill, duke kërkuar që veteranët e Zonës 51 të përfitojnë të njëjtin status dhe mbështetje si punonjësit civilë që kanë punuar në objekte të ekspozuara ndaj rrezatimit.

Sipas tij, dëmet nuk janë ndalur vetëm te trupat ushtarakë. Ai rrëfeu se gruaja e tij kishte pasur tre aborte spontane dhe se të katër fëmijët e tij kishin lindur me defekte të mëdha shëndetësore. “I solla sëmundjen në shtëpi. ADN-ja ime ndryshoi përgjithmonë nga ekspozimi afatgjatë ndaj rrezatimit jonizues”, tha ai.

Në vitin 2000, një ligj i firmosur nga Presidenti Bill Clinton parashikonte kompensim për punëtorët civilë të ekspozuar ndaj rrezatimit në objektet bërthamore. Tani, veteranët kërkojnë të njëjtën mbrojtje ligjore.

Veterani tjetër, Mike Nemcic, shprehu zemërimin e tij: “Është çështje tradhtie. Ata e dinin. Dhe qëllimisht nuk na thanë asgjë. Sepse ishte më e leverdishme për ta, sesa të na mbronin.”