Një shtetas turk i shpallur në kërkim ndërkombëtar është ndaluar nga autoritetet shqiptare në pikën kufitare të Morinës, në momentin që tentonte të hynte në territorin shqiptar.

Burime zyrtare nga Policia bëjnë me dije se Kadir Kuçukologu, 35 vjeç, me banim në Turqi, është arrestuar si rezultat i një operacioni të koordinuar mes shërbimeve të Policisë Kufitare në Morinë dhe DVP Kukës, bazuar në informacione të siguruara përmes inteligjencës policore.

Pas verifikimeve të kryera, rezultoi se 35-vjeçari ishte dënuar nga Gjykata e Lartë për Krimet në Karsikaya, Turqi, me 4 vjet burgim, për veprën penale “Vjedhje me anë të mashtrimit duke përdorur sisteme elektronike të përpunimit të të dhënave, bankë ose institucion huadhënës”.

Autoritetet shqiptare e arrestuan Kuçukologun me qëllim ekstradimin drejt Turqisë, ndërsa Interpol Tirana, në bashkëpunim me homologët turq, ka nisur procedurat për kthimin e tij në vendin e origjinës.

Ky arrestim vjen si pjesë e masave të shtuara për kontrollin dhe goditjen e krimeve kufitare, si dhe ndalimin e personave që janë në kërkim ndërkombëtar.