Pas identifikimit të një sërë problematikash në terren nga deputetë të angazhuar në qytetin e Tiranës, Kryeministri Edi Rama ka kërkuar shtimin e numrit të nënkryetarëve të bashkisë nga katër në pesë, me qëllim përmirësimin e menaxhimit dhe funksionimit të institucioneve vendore.

Vendimi është bërë publik pas mbledhjes së zhvilluar me drejtuesit lokalë dhe anëtarë të kabinetit, ku zëvendëskryeministrja Belinda Balluku paraqiti një analizë të strukturave dhe problematikave në Bashkinë e Tiranës. Në përgjigje të kësaj analize, kryeministri kërkoi riorganizim të rolit drejtues në bashki, me pesë nënkryetarë që do të kenë secili një profil të përcaktuar qartë, duke garantuar mbulim më të mirë të sektorëve kyç.

Për këtë qëllim, do të ngrihet një grup pune për përzgjedhjen e kandidatëve të rinj, ku do të angazhohen figura të njohura si Ogerta Manastirliu, Blendi Gonxhja dhe Petrit Malaj, të cilët do të zhvillojnë intervista me kandidatë potencialë për pozicionet e reja.

Burime nga mbledhja bëjnë me dije se Rama nuk ka kërkuar dorëheqjen e nënkryetarëve aktualë, përkundrazi, i ka ftuar ata të jenë pjesë e procesit të ri përzgjedhës, duke lënë të hapur mundësinë për rikonfirmimin e tyre.

Ndërkohë, Anuela Ristani është ngarkuar me detyrën e digjitalizimit të shërbimeve në Bashkinë e Tiranës, një ndër prioritetet e reja të qeverisë vendore, në linjë me axhendën kombëtare për modernizimin e administratës publike.