Platforma X, në pronësi të miliarderit Elon Musk, ka reaguar ashpër ndaj hetimeve të nisura nga autoritetet franceze të drejtësisë, duke i cilësuar ato si një “hetim penal të motivuar politikisht”, që synon të kufizojë lirinë e shprehjes së përdoruesve të saj. Në një deklaratë zyrtare, kompania ka njoftuar se refuzon të bashkëpunojë me autoritetet franceze, duke hedhur poshtë çdo akuzë për shkelje ligjore.

Hetimet paraprake janë hapur në fillim të korrikut, me qëllim zbardhjen e praktikave të mundshme të paligjshme të platformës, përfshirë manipulimin e algoritmeve dhe mbledhjen pa leje të të dhënave personale. Autoritetet franceze kanë në dorë të ndërmarrin masa drastike nëse nuk ka bashkëpunim nga X, përfshirë kontrolle elektronike, marrje në pyetje të stafit dhe vetë Elon Musk, si dhe lëshim të urdhrave të mundshëm arresti.

Platforma pretendon se kërkesat e drejtësisë franceze janë në kundërshtim me parimet demokratike dhe lirinë e fjalës. Sipas saj, autoritetet kanë kërkuar dorëzimin e të gjitha postimeve të përdoruesve, të cilat do t’i nënshtroheshin analizës nga studiues që, sipas X, janë “armiqësorë” ndaj kompanisë. Në deklaratën e saj, X thekson se “çështja është keqinterpretuar me qëllim për të ndjekur një agjendë politike”.

Për më tepër, hetimi po zhvillohet në kuadër të ligjit për krimin e organizuar, çka i jep policisë kompetenca të gjera, përfshirë mbikëqyrjen e pajisjeve personale të punonjësve të platformës. Kjo ka shtuar tensionet mes kompanisë dhe autoriteteve franceze.

Ndërkohë, deputeti francez Éric Bothorel, i cili ka akuzuar X për manipulime të algoritmit dhe për nxitje të ndërhyrjeve të huaja, ka mbrojtur hetimin dhe pavarësinë e sistemit gjyqësor francez. Sipas tij, “liria e fjalës nuk mund të jetë absolute dhe jashtë çdo rregullimi”.

Kjo përplasje vjen në një moment ku marrëdhëniet mes Shteteve të Bashkuara dhe Bashkimit Europian janë tensionuar për shkak të rregullimeve të reja mbi përmbajtjen digjitale. Paralelisht, Komisioni Europian po zhvillon një hetim të veçantë ndaj X për shkelje të rregullave të BE-së lidhur me përmbajtjen e paligjshme në rrjet.

Elon Musk, i njohur për qëndrimet e tij provokative dhe përkrahjen ndaj forcave politike të djathta në SHBA dhe Evropë, ka qenë kritik i zëshëm i përpjekjeve evropiane për të rregulluar platformat online, duke akuzuar institucionet europiane për censurë dhe kufizim të lirive themelore.