E ardhmja e Kristjan Asllanit te Interi duket se ka hyrë në një fazë pa kthim. Sipas portalit FCInter1908, drejtuesit zikaltër janë të vendosur të shesin mesfushorin shqiptar, për të përfituar financiarisht dhe për të krijuar hapësira në skuadër.

23-vjeçari ka refuzuar një transferim në Spanjë, konkretisht te Real Betis, edhe pse drejtuesit e Interit kishin pranuar ofertën e klubit andaluzian. Sipas burimeve, Asllani ka përmendur arsye familjare për vendimin e tij dhe ka shprehur dëshirën për të qëndruar në Serie A, duke mos pranuar oferta jashtë Italisë.

Ky qëndrim e ka vënë në vështirësi Interin, që kërkon rreth 18 milionë euro për kartonin e mesfushorit, ndërkohë që interesi konkret nga klubet italiane mungon, edhe për shkak të kostos së lartë.

Zikaltrit planifikojnë që të ardhurat nga shitja e Asllanit t’i përdorin për të financuar blerjen e sulmuesit Ademola Lookman nga Atalanta, ndërkohë që kanë në radar edhe mbrojtësin Giovanni Leoni, për ta vënë në dispozicion të Cristian Chivut, trajnerit të ri të mbrojtjes.

Në këtë kuadër, largimi i Asllanit është bërë një domosdoshmëri për klubin, i cili kërkon të ruajë balancën financiare dhe të përforcojë skuadrën për sezonin e ardhshëm.

Asllani, që u transferua te Interi si një prej talenteve më premtues të mesfushës, nuk ka arritur të sigurojë një vend të qëndrueshëm titullari, dhe duket se aventura e tij në Milano është drejt fundit.