Një vatër zjarri është aktivizuar mbrëmjen e së mërkurës në periferi të fshatit Finiq, në jug të Shqipërisë, duke rrezikuar drejtpërdrejt Parkun Arkeologjik të kësaj zone – një nga pasuritë më të rëndësishme kulturore të vendit.

Sipas informacioneve paraprake, flakët po përparojnë me shpejtësi, të favorizuara nga era dhe temperaturat e larta, në drejtim të strukturave të vjetra brenda parkut, i cili vitin e kaluar gjithashtu u përball me rrezikun nga zjarret.

Autoritetet vendore dhe zjarrfikësit ndodhen në terren për të bërë të mundur izolimin e flakëve, ndërkohë që banorët shprehin shqetësim për mungesën e mjeteve të duhura dhe reagimin e ngadaltë të strukturave përgjegjëse.

Parku Arkeologjik i Finiqit është një zonë me rëndësi të jashtëzakonshme historike, ku ruhen gjurmë të qytetërimit iliro-epirot dhe monumente të rralla antike. Çdo dëm që mund t’i shkaktohet këtij parku konsiderohet një humbje e parikuperueshme për trashëgiminë kombëtare.

Ndërkohë, Ministria e Kulturës dhe ajo e Mbrojtjes janë informuar për situatën, por deri më tani nuk ka ende një reagim zyrtar mbi masat për mbrojtjen e monumenteve në rrezik.

Situata vijon të mbetet kritike, ndërsa pritet që në orët në vijim të ketë përforcime nga brigadat zjarrfikëse të qyteteve fqinje.