Ish-ylli i tenisit botëror, Maria Sharapova, ka vendosur të shesë rezidencën e saj luksoze në Los Angeles për çmimin marramendës prej 21.8 milionë euro, duke hapur kështu një kapitull të ri jashtë Shteteve të Bashkuara.

Lajmi është raportuar fillimisht nga The Wall Street Journal dhe më pas konfirmuar nga The Sun, duke theksuar se vendimi i 38-vjeçares lidhet me një zhvendosje të mundshme drejt Evropës, ku ajo pritet të nisë një jetë të re së bashku me partnerin e saj, biznesmenin britanik Alexander Gilkes.

Shtëpia, e ndërtuar me stil japonez minimalist, ndodhet në një nga lagjet më të kërkuara të qytetit. E veçanta e saj është kombinimi i mureve prej betoni, pamjeve mahnitëse të Oqeanit Paqësor dhe ishullit Catalina, një pishinë moderne e vendosur pranë ndërtesës kryesore dhe një pistë bowling-u që pasqyron luksin dhe individualitetin e ish-sportistes.

Në një intervistë me “Architectural Digest” në vitin 2019, Sharapova zbuloi se kishte menduar çdo detaj të shtëpisë, përfshirë dhe vendosjen e pishinës afër kuzhinës për të ruajtur një lidhje vizuale të drejtpërdrejtë me ujin.

Pas një karriere të shkëlqyer që kulmoi me fitoren e Wimbledonit në moshën 17-vjeçare kundër Serena Williams, Sharapova mbetet një nga emrat më të mëdhenj në historinë e sportit. Ajo është e vetmja ruse që ka fituar të katër turnetë Grand Slam dhe ndër tenistet më të njohura të shekullit XXI.

Pavarësisht sukseseve në fushë, ajo ka kaluar edhe periudha të vështira, përfshirë pezullimin në vitin 2016 për përdorimin e substancës meldonium. Në vitin 2020, për shkak të lëndimeve kronike, ajo u tërhoq zyrtarisht nga sporti me një mesazh prekës drejtuar fansave.

Sharapova dhe Gilkes janë bashkë që nga viti 2018 dhe u fejuan në fund të vitit 2020. Në vitin 2022 ata mirëpritën fëmijën e tyre të parë. Tashmë, duket se çifti po planifikon të ndërtojë një jetë të re në Evropë, duke mbyllur një kapitull të gjatë në Kaliforni dhe hapur dyert drejt projekteve të reja personale dhe profesionale.