Zjarri që ka përfshirë zonën e Delvinës ka marrë përmasa dramatike, duke shkrumbuar mbi 11 banesa dhe disa objekte biznesi në fshatrat Vergo dhe Palavli. Terreni i vështirë dhe era e fortë kanë bërë që zjarrfikësit të mos arrijnë të izolojnë vatrat e flakëve.

Pamjet nga vendngjarja tregojnë skena apokaliptike, ndërsa Ministria e Mbrojtjes ka urdhëruar evakuimin e banorëve në Palavli, Vergo dhe Kopaçëz.

“Forcat e emergjencave civile, policia dhe autoritetet vendore janë në terren. U bëjmë thirrje banorëve të respektojnë udhëzimet dhe të bashkëpunojnë për mbrojtjen e jetës dhe pronës,” – thuhet në njoftimin zyrtar.

Dy helikopterë të Forcës Ajrore janë angazhuar mbi zonën e Delvinës, ndërsa dy të tjerë po veprojnë në qarkun Berat-Dimal për të ndaluar përhapjen e flakëve.