Thashethemet për identitetin e supozuar transgjinor të zonjës së parë të Francës kanë qarkulluar prej vitesh në rrjetet sociale, por këtë herë Brigitte Macron ka vendosur të ndjekë deri në fund betejën ligjore.

Pas vendimit të një gjykate apeli që liroi dy influencere franceze nga akuzat për shpifje, Brigitte Macron dhe vëllai i saj e kanë apeluar çështjen në Gjykatën e Kasacionit, siç konfirmoi avokati i tyre për AFP.

Videoja që ndezi polemikat u publikua në YouTube në vitin 2021, ku dy gratë pretendonin se Brigitte Macron ishte në fakt vëllai i saj, i cili kishte kaluar një operacion për ndryshim gjinie. Ato e quajtën këtë një “gënjeshtër shtetërore”.

Presidenti Emmanuel Macron dhe bashkëshortja e tij kanë hapur gjithashtu një proces për shpifje në Delaware kundër influencueses amerikane Candace Owens. Sipas dokumenteve të gjykatës, Owens kishte përhapur pretendime të rreme në Platformën X dhe në podkastin e saj në mars 2024, duke e ditur se “vlera tronditëse do të rriste dukshmërinë e saj”.

Në vend të tërheqjes së përmbajtjes, Owens publikoi deklarata të tjera të rreme, ku aludonte madje se “Emmanuel Macron u bë president me ndihmën e një programi të CIA-s”.

Zonja e parë franceze ka bërë të qartë se nuk ka ndërmend të ndalet dhe do të ndjekë të gjitha rrugët ligjore kundër atyre që përhapin thashetheme të pabazuara.