Kryeministri Edi Rama ka reaguar ashpër pas ngjarjes së rëndë të ndodhur mbrëmjen e djeshme në një hotel në Vlorë, ku nënkomisari i Policisë së Dibrës, Ardian Isufi, dhe shoku i tij Leart Bimo, dhunuan brutalisht një kamarier 18-vjeçar vetëm për një shishe ujë të sjellë më tepër se porosia.

Në një reagim publik, Rama thekson se Isufi duhet të përjashtohet përfundimisht nga radhët e Policisë së Shtetit dhe të dorëzohet menjëherë në duart e drejtësisë, sapo të dalë nga spitali.

“Pezullimi nga detyra i efektivit të Policisë së Shtetit Dibër, që jashtë shërbimit ka marrë pjesë në një konflikt të shëmtuar fizik në Vlorë, është vetëm masa e parë që duhet të pasohet nga përjashtimi i këtij individi pa kthim në radhët e policisë, si edhe nga dorëzimi i tij në duart e drejtësisë sapo të dalë nga spitali,” – shkruan Rama.

Isufi aktualisht ndodhet në spital, pasi pronari i hotelit, Vasil Bedinaj, ndërhyri për të mbrojtur kamarierin e tij dhe i kundërpërgjigj dhunës.

Ngjarja ka shkaktuar reagime të shumta në opinionin publik, për shkak se dhuna ndodhi në një zonë turistike, në prani të dhjetëra klientëve vendas dhe të huaj.