Policia e Berlinit ka njoftuar të dielën se ka arrestuar 57 persona pas një proteste pro-palestineze të mbajtur të shtunën, në të njëjtën ditë me marshin vjetor të Krenarisë në kryeqytetin gjerman. Përplasjet mes protestuesve dhe forcave të rendit lanë të plagosur 17 efektivë policie.

Sipas autoriteteve, rreth 10 mijë persona morën pjesë në tubimin në mbështetje të palestinezëve. Policia ndërhyri për shpërndarjen e turmës pasi organizatorët nuk arritën të rivendosnin rendin. Arrestimet u kryen për rezistencë ndaj forcave të rendit, hedhje objektesh të forta, përplasje fizike dhe përdorimin e sloganeve antisemitike apo simboleve të ndaluara të organizatave terroriste.

Protesta u organizua nga lëvizja “Internationalist Queer Pride for Liberation”, e cila në faqen e saj thekson se “nuk ka çlirim queer pa një luftë anti-imperialiste, anti-kolonialiste dhe anti-zioniste”.

Ndërkohë, në një pjesë tjetër të qytetit, ku po zhvillohej parada vjetore e Krenarisë, policia raportoi 64 arrestime për fyerje, akte dhune dhe përdorim të simboleve të ndaluara. Në një tjetër demonstratë të ekstremit të djathtë kundër paradës, u arrestuan 20 persona të tjerë.

Gjermania ka qenë muajt e fundit skenë e protestave të shpeshta pro-palestineze, në sfondin e luftës Izrael-Hamas, e cila vijon që prej 7 tetorit 2023. Sipas shifrave zyrtare, nga sulmi fillestar i Hamasit humbën jetën 1.219 persona në Izrael, ndërsa ofensiva izraelite në Gazë ka shkaktuar mbi 59 mijë viktima palestineze, shumica civilë.

Në këtë klimë tensioni, Berlini zyrtar ka rritur tonet kritike ndaj Izraelit, edhe pse mbetet një nga mbështetësit e tij më të fortë. Gjermania ka deklaruar se njeh shtetin palestinez vetëm si pjesë të një zgjidhjeje përfundimtare me dy shtete.