Ndërsa IKMT po kryen aksione në veri për prishjen e ndërtimeve pa leje në Theth, në jug të vendit një konflikt i ngjashëm ka shpërthyer në Ersekë, ku kryebashkiaku Erion Isai (i njohur në zonë si “Çuçka”) ka paralajmëruar prishjen e një stalle bagëtish të fermerit Elodjan Beqo.

Sipas Beqos, objekti është ndërtuar para vitit 2020 në tokën e tij të hipotekuar dhe prej vitit 2021 është në proces legalizimi. Ai pretendon se ka të gjitha dokumentet dhe paguan rregullisht taksat e fermës.

Megjithatë, bashkia i ka dërguar një njoftim zyrtar për prishjen e objektit ditën e hënë, më 28 korrik, në orën 11:00, në zonën e quajtur “Pyllëzimi i Ersekës”.

Fermeri ka depozituar një kallëzim penal në prokurori ndaj kryebashkiakut për “Shpërdorim detyre”, “Mbajtje pa të drejtë të titujve” dhe “Kryerje veprimesh arbitrare”, duke akuzuar Isain se ka anashkaluar procedurat ligjore dhe ka marrë në dorë kompetencat e IMT-së.

Nga ana tjetër, bashkia argumenton se objekti është i paligjshëm dhe duhet shembur. Ngjarja ka ndezur debate në qytetin juglindor për mënyrën se si po veprohet ndaj ndërtimeve të fermerëve, ndërkohë që çështja i është referuar prokurorisë për hetim.