Hawaii – Një ngjarje e rëndë ka tronditur Maui-n, ku një roje sigurie u gjet i pajetë në një resort plazhi.

Mediat e huaja raportojnë se i dyshuari për ngjarjen është një 20-vjeçar, student dhe kampion noti. Sipas autoriteteve, i riu është filmuar nga kamerat e sigurisë duke lëvizur pa rroba në zonën e resortit gjatë orëve të para të mëngjesit.

Sipas hetimeve, Legend Storer u pa rreth orës 01:45 duke u drejtuar drejt zyrës së sigurisë së resortit. Brenda saj ndodhej 63-vjeçari i identifikuar si Dyer, i cili po pushonte gjatë turnit të tij.

Policia dyshon se Storer hyri me forcë në zyrë dhe e sulmoi rojën, duke përdorur edhe një enë të madhe uji me kapacitet rreth 19 litra. 63-vjeçari ndërroi jetë si pasojë e plagëve të marra.

Një koleg i viktimës e përshkroi atë si një njeri të dashur dhe të respektuar.

“Ai ishte një person i mrekullueshëm. Ai thjesht ishte ulur në tavolinën e tij duke ngrënë një hamburger me djathë gjatë pushimit”, tha kolegu.

Ai shtoi se Dyer ishte i martuar dhe se gruaja e tij punonte në një restorant lokal.

I dyshuari u gjet pas telefonatave të banorëve

Pas sulmit, 20-vjeçari dyshohet se u largua nga resorti pa u pikasur.

Rreth dy orë më vonë, policia mori disa telefonata nga banorë të zonës, të cilët raportuan për një burrë pa rroba që po endej në një lagje aty pranë.

Sipas dëshmive të banorëve, i riu bërtiste vazhdimisht fraza me përmbajtje fetare.

“Dëgjova një burrë duke bërtitur: ‘Jezusi të do. Jezusi jam unë. Unë jam Jezusi’. Ai vazhdoi ta përsëriste vazhdimisht, ndoshta 15 herë”, tregoi një banor vendas.

Kur oficerët e gjetën Storer, ai kishte gërvishtje në trup. I riu u dërgua në spital për t’iu nënshtruar një vlerësimi.

Ndërkohë, rreth orës 05:30, autoritetet gjetën trupin e pajetë të rojës së sigurisë në zyrën e resortit.

Lidhja e 20-vjeçarit me ngjarjen u evidentua, sipas policisë, pas shqyrtimit të pamjeve të kamerave të sigurisë. Në to dyshohet se është dokumentuar lëvizja e tij në resort dhe hyrja në zyrën ku ndodhej viktima.

Hetimet për zbardhjen e plotë të rrethanave të ngjarjes vijojnë.