Nga jashtë dukej si një depo e zakonshme industriale në periferi të Lodit, por brenda saj policia italiane gjeti një “shtëpi” të vërtetë për kanabisin.

Të hënën pasdite, efektivët e policisë lokale të Unione Nord Lodigiano zbuluan në Montanaso Lombardo një plantacion modern droge, të ndërtuar në një hapësirë prej 1,000 metrash katrorë. Brenda saj ishin ngritur pesë dhoma të posaçme për kultivimin dhe përpunimin e marijuanës, me sisteme të ndriçimit natriumi, ventilimi dhe tharjeje, peshore precize, pajisje paketimi dhe një sistem të avancuar kamerash sigurie.

Gjatë kontrollit u gjetën mbi 200 bimë marijuane dhe rreth 15 kilogramë drogë e gatshme për shitje. Në momentin e ndërhyrjes, dy persona – një shqiptar dhe një francez, të dy me precedentë penalë për trafik droge – u gjetën të fshehur nën një kapak në dyshemenë e magazinës dhe u arrestuan.

Sipas policisë, kjo ishte një linjë e plotë prodhimi, nga fara deri te paketimi, me një vlerë fillestare të llogaritur prej 300 mijë eurosh që mund të shkojë deri në 600 mijë euro duke përfshirë pajisjet dhe investimin teknik.

Magazina, e marrë me qira në emër të një gruaje vendase, ra në sy të autoriteteve pas ankesave për lëvizje të dyshimta dhe erë të fortë marijuane. Pas hetimeve, u sigurua urdhri i prokurorisë së Lodit dhe operacioni u zhvillua me mbështetjen e zjarrfikësve.

Ndërkohë, hetimet po thellohen për të zbuluar rrjetin kriminal që qëndron pas laboratorit të sofistikuar dhe lidhjet e mundshme me shpërndarjen dhe financuesit e këtij aktiviteti.