Një ngjarje e rëndë ka tronditur Karolinën e Jugut, ku një djalë 12-vjeçar, Jaysen Carr, humbi jetën pas infektimit me amebën vdekjeprurëse Naegleria fowleri, e njohur ndryshe si “ameba që ha trurin”.

Jaysen u ekspozua ndaj këtij mikroorganizmi gjatë pushimeve të 4 Korrikut, teksa po notonte në Lake Murray, një nga liqenet më të frekuentuara në rajon. Pas disa ditësh, ai shfaqi dhimbje koke dhe përzierje, simptoma që u përkeqësuan me shpejtësi, duke i marrë jetën më 18 korrik.

Apeli i babait
I shkatërruar nga humbja e djalit, babai i tij, Clarence Carr, kërkoi rritjen e ndërgjegjësimit për rrezikun që paraqet ky mikroorganizëm:

“E humbëm djalin tonë vetëm sepse ai notoi në një vend që mendonim të sigurt. Jam i tmerruar se kjo mund t’i ndodhë dikujt tjetër,” – tha ai për Associated Press.

Familja denoncoi gjithashtu faktin se në Karolinën e Jugut nuk ka detyrim ligjor për të raportuar publikisht rastet e infeksioneve apo vdekjeve nga kjo amebë.

Ata kanë hapur edhe një faqe GoFundMe, si dhe kanë nisur një fushatë sensibilizimi për të paralajmëruar prindërit mbi rrezikun e ujërave të ëmbla të ngrohta gjatë verës.

Çfarë është “ameba që ha trurin”?
Naegleria fowleri gjendet në ujëra të ëmbla dhe të ngrohta (liqene, lumenj, apo pishina të pasigurta). Infeksioni ndodh kur uji hyn përmes hundës gjatë zhytjes ose notit, dhe ameba udhëton drejt trurit duke shkaktuar dëmtime fatale në pak ditë.

Sëmundja ka një shkallë vdekshmërie mbi 97%, duke e bërë ndër infeksionet më të rrezikshme në botë.