Korçë – Incidenti që tronditi qytetin e Korçës dy ditë më parë vijon të ndezë debatet në rrjet dhe opinionin publik. Kostandin Dramolli, i njohur me emrin artistik “Çekiçi 14”, është 26-vjeçari që në shenjë proteste kundër aksioneve për lirimin e hapësirave publike, theu me gurë xhamat e godinës së Bashkisë së Korçës, një akt që e filmoi dhe shpërndau vetë në rrjetet sociale.
Në një prononcim për mediat, Dramolli sqaroi motivet e veprimit të tij, duke deklaruar se ishte një reagim ndaj, siç e cilësoi ai, një padrejtësie të qeverisë. Sipas tij, vendimi për të ndërhyrë në lagjen nr.14, ku ai jeton, i ka prekur jo vetëm bizneset lokale, por edhe detaje të vogla si lule dekorative që ishin mbjellë nga vetë banorët.
“E ka marrë vesh gjithë Shqipëria incidentin. E bëra viral sepse populli nuk duhet të flejë, duhet të çohet dhe të tregojë karakter. Nuk pendohem unë, ishte një vendim i drejtë. Edhe burg e bëj, s’ka problem,” u shpreh ai.
I riu, ish-portier i disa ekipeve shqiptare dhe tashmë reper aktiv në skenën “underground”, e shfrytëzoi momentin për të lëshuar një mesazh të drejtpërdrejtë për kryeministrin Edi Rama, të cilin e akuzon për një urdhër politik që solli ndërhyrjen në lagjen e tij.
“E mori në telefon Sotiraqin dhe e shkatërruan lagjen time. Heqin karriget, tavolinat, lulet. Nga ato katër tavolina familjarët nxjerrin bukën. Kjo nuk është sjellje prej kryeministri. Duhet të shohë popullin, jo të shkatërrojë lagjet e njerëzve që mezi mbijetojnë.”
Dramolli, që nuk e mohon të shkuarën e tij penale, thekson se nuk do të ndalet së ngrituri zërin, madje paralajmëron se nëse situata vazhdon, do të ketë përshkallëzim.
“Nuk ka rëndësi sa i madh është Rama, populli duhet të ngrejë zërin. Unë kam çunat, gjithë qytetin me vete. Do t’i shkojë fjala edhe Bashkisë, edhe zotit Rama. Nëse nuk ndalet, kjo histori do bëhet më e madhe.”
Ngjarja e Korçës ka hapur një diskutim të ri për tensionet sociale që po shoqërojnë operacionet e qeverisë për lirimin e hapësirave publike. Ndërkohë, autoritetet lokale ende nuk kanë bërë një deklaratë zyrtare për incidentin dhe as për dëmet e shkaktuara.
Prokuroria ka nisur hetimet ndaj Dramollit, i cili pritet të përballet me akuza për dëmtim prone publike dhe nxitje për protesta të dhunshme. Ai ndërkohë e konsideron veten “zëri i lagjes” dhe thotë se nuk ka ndërmend të ndalet.
