Kryeministri në detyrë i Kosovës, Albin Kurti, ka reaguar pas tërheqjes së kërkesës së presidentes Vjosa Osmani nga Gjykata Kushtetuese, vendim që erdhi për shkak të përfshirjes së gjyqtarit Radomir Laban si kryesues i çështjes që lidhej me zgjidhjen e ngërçit politik në vend.

Pas një vizite në Klinikën Kardiologjike në Prishtinë, Kurti u shpreh se presidentja nuk ka qenë në dijeni se Laban do të ishte në krye të shqyrtimit të kësaj çështjeje të ndjeshme kushtetuese.

“Është absurde që dikush që është i papërshtatshëm, me rrezik për rendin tonë kushtetues, të jetë ai që gjykon për një çështje kushtetuese kaq të rëndësishme,” u shpreh Kurti.

Ai e cilësoi këtë përzgjedhje si një kërcënim për besueshmërinë institucionale dhe theksoi nevojën për integritet dhe paanshmëri në proceset kushtetuese, sidomos në rrethana ku vendi ndodhet në një ngërç politik delikat.

Kryeministri në detyrë komentoi gjithashtu takimin me emisarin e posaçëm të BE-së për dialogun Kosovë–Serbi, duke u shprehur shkurtimisht se “bisedimet kanë vazhduar me theks në marrëveshjet e pazbatuara nga pala serbe”.

Tërheqja e kërkesës nga presidentja Osmani dhe përfshirja e gjyqtarit Laban në këtë rast ka shkaktuar debat të gjerë në opinionin publik dhe në qarqet politike në Kosovë, duke ngjallur shqetësime mbi rolin dhe përfaqësimin në instanca të larta gjyqësore.