ATHINË – Asnjë lajm nuk mund të kishte tronditur më shumë publikun grek sesa ndarja nga jeta e Lena Samaras, vetëm 34 vjeçe, vajza e parë e ish-kryeministrit Antonis Samaras.

Ceremonia mortore do të zhvillohet sot në orën 13:00, në Kishën e Shën Theodhorit, në Varrezat e Para të Athinës, ku të afërm, miq dhe bashkëpunëtorë do t’i japin lamtumirën e fundit.

“Një vajzë fisnike, diskrete dhe plot jetë,” – kështu e përshkruajnë ata që e kanë njohur nga afër, ndërsa mediat greke theksojnë se humbja e saj ka prekur zemrat e të gjithëve, pavarësisht se Lena kishte zgjedhur të mbetej larg vëmendjes publike.

E lindur në vitin 1991, Lena ndoqi studimet në Kolegjin e Athinës deri në vitin 2008 dhe më pas u diplomua në Inxhinieri Civile në Saint George’s College, Londër, në vitin 2015. Me një trashëgimi familjare të rëndë në politikë dhe kulturë, ajo preferoi një jetë private, duke i lënë kujtimet e saj më shumë për familjen dhe njerëzit e besuar.

Tragjedia ndodhi mbrëmjen e 7 gushtit 2025. Sipas njoftimit zyrtar të Ministrisë së Shëndetësisë:

“Gjatë hetimit të shkaqeve të gjendjes së saj, pacientja përjetoi përkeqësim të shpejtë dhe, pavarësisht përpjekjeve mbinjerëzore të stafit mjekësor dhe infermieror, pacientja vdiq më 07/08 në orën 22:29.”

Burime mjekësore konfirmuan se Lena pësoi një krizë epileptike të shoqëruar me arrest kardiak.

Mediat greke e përshkruajnë si “një humbje të parakohshme, që ka lënë boshllëk të madh në zemrat e atyre që e deshën dhe e respektuan”.