Presidenti rus Vladimir Putin po përgatit një propozim të favorshëm për Donald Trump-in mbi çështjen e Ukrainës, në prag të samitit të planifikuar në Alaska — takimi i parë i plotë Rusi–SHBA në tokë amerikane pas 15 vitesh.

Lajmi u bë i ditur nga Dmitry Suslov, zëvendësdrejtor i Qendrës për Studime Evropiane dhe Ndërkombëtare në Shkollën e Lartë të Ekonomisë dhe këshilltar i afërt i Kremlinit për politikën e jashtme.

Sipas tij, ekzistojnë dy skenarë kryesorë që mund të dalin nga ky takim.

Skenari i parë: një plan armëpushimi i miratuar drejtpërdrejt mes SHBA-së dhe Rusisë, duke përjashtuar nga negociatat Kievin dhe kryeqytetet evropiane.
“Ky plan mund të përfshijë tërheqjen e forcave ukrainase nga zonat e Donbasit ku ende janë të pranishme, si dhe tërheqjen e trupave ruse nga disa rajone të tjera,” shpjegoi Suslov.
Vijat e frontit do të mbeteshin të pandryshuara në pjesën tjetër të territorit, ndërsa Ukraina do të angazhohej të mos i bashkohej NATO-s, të ndërmerrte hapa drejt demilitarizimit dhe të bënte reforma kushtetuese në drejtim federal.

Skenari i dytë: nëse presidenti ukrainas Volodymyr Zelensky, me mbështetjen e evropianëve, e refuzon ofertën, Trump mund të reagojë duke ndërprerë ndihmën ushtarake për Kievin dhe duke bllokuar furnizimin me armë nga vendet evropiane.
“Kjo, sipas Suslov, do të përshpejtonte humbjen e Ukrainës.”

Suslov theksoi gjithashtu se Trump mund të ketë një arsye shtesë për të pranuar marrëveshjen e Putinit: dështimi i kërkesës së tij ndaj Kinës, Indisë dhe Brazilit për të ndalur importin e naftës ruse. “Një marrëveshje për armëpushim do ta ndihmonte atë të shmangte një krizë të madhe tregtare dhe diplomatike me vendet kryesore të BRICS,” tha ai.

Vendndodhja e samitit — Alaska — ka një simbolikë të veçantë, duke përfaqësuar një terren ekskluzivisht ruso-amerikan, larg ndikimit të Evropës, por afër Rusisë. Përveç Ukrainës, pritet që të diskutohet edhe për Arktikun, një rajon strategjik ku interesat ushtarake dhe mundësitë për bashkëpunim ekonomik mes dy vendeve po rriten.

“Ky samit është një shans për të kthyer faqen në marrëdhëniet mes dy fuqive,” përfundoi Suslov.