Një 40-vjeçar është arrestuar në Tepelenë, pasi dyshohet se ka ndezur zjarr në një tokë të marrë me qira, duke shkaktuar përhapjen e flakëve që dogjën 5 stane, bagëti dhe sipërfaqe të mëdha pyjore në zonën midis fshatrave Kodër dhe Lekël.

Policia e Tepelenës, menjëherë pas njoftimit për zjarret, nisi hetimet dhe identifikoi autorin e dyshuar, shtetasin E.M., banues në fshatin Kodër. Si pasojë e zjarrvënies, u dëmtuan pemë frutore, 5 stane me bazë ushqimore për bagëti dhe u dogjën 3 krerë bagëti të trasha.

Që nga mëngjesi i djeshëm, autoritetet mbajnë nën kontroll perimetrin e zjarrit dhe punojnë intensivisht për shuarjen e flakëve, në bashkëpunim me DVP Gjirokastër dhe shërbimet zjarrfikëse.

Materialet procedurale për këtë ngjarje janë referuar Prokurorisë së Gjirokastrës për veprime të mëtejshme, ndërsa 40-vjeçari akuzohet për veprën penale “Shkatërrimi me zjarr i pyjeve dhe i mjedisit pyjor”.

Drejtoria Vendore e Policisë Gjirokastër apelon fort ndaj qytetarëve që të mos shkaktojnë zjarrvënie dhe u bën thirrje të denoncojnë çdo rast të tillë në numrin 112, duke garantuar anonimat dhe reagim të shpejtë.