Kryeministri Edi Rama njoftoi sot se zjarret që kanë përfshirë disa zona të vendit po vihen gradualisht nën kontroll, ndërkohë që puna për shuarjen e tyre vazhdon pa ndërprerje për çdo riaktivizim të mundshëm.

Në një postim në rrjetet sociale, Rama u shpreh se dy ditë e netë kanë qenë “ekstremisht të vështira”, duke përmendur zonat më të prekura si Skënderbegas dhe Sojnik të Gramshit, Koshtan të Memaliajt, Hormovë, Kodër e Lekël të Tepelenës, Dhivër, Kakodhiq në Finiq, si dhe Dropull në kufi me Delvinën. Kryeministri theksoi se rreziku dhe flakët kanë qenë të pamëshirshme, por falë guximit dhe angazhimit të forcave në terren, situata po stabilizohet.

“Falë guximit vetëmohues dhe angazhimit total të të gjitha forcave në terren, është arritur fatmirësisht që zjarret të vihen nën kontroll, ndërkohë që vazhdon puna papushim drejt shuarjes së tyre dhe gatishmëria maksimale për çdo riaktivizim të mundshëm apo vatra të reja”, shkroi Rama.

Kryeministri bëri thirrje ndaj banorëve të tregohen të kujdesshëm, të sinjalizojnë çdo vatër zjarri dhe të ndjekin këshillat e autoriteteve. Ai paralajmëroi gjithashtu se për “kriminelët që luajnë me flakët, ndëshkimi do të jetë maksimal”.

Gjatë 24 orëve të fundit janë evidentuar 64 vatra zjarri, nga të cilat 24 janë ende aktive. Ministria e Mbrojtjes njoftoi se mbi 10 mijë forca të emergjencave, nën koordinimin e Agjencisë së Mbrojtjes Civile, ndodhen në terren dhe situata po shkon drejt stabilizimit.