Presidenti i Serbisë, Aleksandër Vuçiç, ka deklaruar në mënyrë të prerë se nuk ka aspak në plan të ndryshojë Kushtetutën për t’u kandiduar sërish për president. Ai theksoi se mandati i tij aktual do të përfundojë brenda një viti e gjysmë dhe se nuk ka ndërmend të shkelë ligjin apo traditën demokratike të vendit.

“Unë jam një veteran politik dhe nuk mund të kandidoj më për president, dhe as që më shkon ndër mend të ndryshoj Kushtetutën për ta bërë këtë. Nuk jam diktator, siç më paraqesin zakonisht mediat austriake. Karrierën time si president do ta përfundoj për një vit e gjysmë,” tha Vuçiç gjatë një konference për shtyp me kancelarin austriak, Christian Stocker, në Beograd.

Ai njoftoi gjithashtu se zgjedhjet në Serbi do të shpallen përpara afatit ligjor, por nuk dha një datë të saktë, duke theksuar se kjo është kompetencë e institucioneve shtetërore.

“Do të ndihmoj dikë dhe do të luftoj që ata që mendoj se mund ta çojnë Serbinë përpara të kenë sukses në zgjedhje – këtë do ta bëj patjetër. Nga cilat pozita, kjo nuk është temë tani, dhe as nuk mund ta them,” shtoi Vuçiç.

Presidenti serb pohoi se zgjedhjet do të jenë pasqyrë e mendimit të popullit dhe nënvizoi se protestat dhe demonstratat janë forma legjitime të shprehjes së pakënaqësisë, për sa kohë që nuk kthehen në dhunë.