Ngjarja e rëndë që tronditi fshatin Pirg të Maliqit më 14 gusht ka marrë zhvillime të reja. Pas hetimeve intensive, policia ka vënë në pranga tetë persona të përfshirë në mënyra të ndryshme në vrasjen e 14-vjeçarit Erald Xhejo nga bashkëmoshatari i tij, Enedio Guri.

Sipas burimeve, tragjedia ndodhi në ambientet e një lokali të fshatit, ku dy adoleshentët ishin takuar për “sqarime” pas një debati të ashpër në rrjetet sociale dhe përplasjeve një ditë më parë. Takimi përfundoi në konflikt fizik, gjatë të cilit Guri dyshohet se goditi me thikë Xhejon, duke i shkaktuar plagë të rënda që rezultuan fatale.

Autori i dyshuar u arrestua menjëherë, ndërsa babai dhe xhaxhai i tij akuzohen se kanë fshehur mjetin prerës të krimit. Katër të mitur dhe një 34-vjeçar, të pranishëm gjatë sherrit, u arrestuan për pengim të hetimeve dhe moskallëzim krimi.

Në rrjetet sociale kanë qarkulluar foto të Enedio Gurit, ku ai shihet i pozicionuar me armë gjahu dhe cigare në dorë, si dhe me mbishkrime provokuese si: “Mos më kërko, unë nuk vij” dhe “Por shfaqem, kur ty s’të pret mendja”.

Policia ka sekuestruar thikën e krimit, automjetin me të cilin tentuan të largoheshin dy prej të arrestuarve dhe pesë telefona celularë. Hetimet vijojnë për zbardhjen e plotë të rrethanave të këtij krimi që ka tronditur opinionin publik dhe ka hapur sërish debatin për dhunën mes të miturve.