Mediat e Kosovës kanë zbardhur detaje të reja nga masakra që tronditi Gjilanin, ku tre persona humbën jetën dhe disa të tjerë mbetën të plagosur në një përplasje të armatosur.

Ngjarja ka në qendër emrin e njohur për fajde, Mefail Shkodra, i cili, bashkë me dy djemtë e tij — Engjëll dhe Edonis Shkodra — është shpallur në kërkim. Të tre u plagosën gjatë shkëmbimit të zjarrit, me Engjëllin që ka marrë një goditje në krah, ndërsa Edonisi ndodhet në gjendje të rëndë.

Ngjarja nisi më 21 korrik, kur Shkodra u mor në pyetje pas një kallëzimi nga Bujar Hoxha, një tjetër figurë e njohur në qytet. Dhjetë ditë më vonë, Shkodra paditi Hoxhën për deklarim të rremë. Më pas, Edmond Hasani e ftoi Shkodrën në një takim “miqësor”, që rezultoi fatal.

Pamjet dhe audio-incizimet e publikuara nga Gazeta Insajderi tregojnë momentin kur Shkodra refuzon të takohet me Hoxhën për shkak të një procesi penal në zhvillim. “Nuk guxon me ma pru Bujarin këtu…”, dëgjohet ai, para se shpërthejnë të shtënat.

Sipas burimeve, sherri lidhet me një borxh për një Audi Q5, që çoi në bllokimin e llogarive të Bujar Hoxhës nga përmbaruesi Përparim Xhelili.

Viktimat janë babë e bir, Selami Hasani dhe Edmond Hasani, të njohur si argjendarë, ndërsa në listën e të plagosurve është edhe vetë Bujar Hoxha, aktualisht në gjendje të qëndrueshme.

Pas ngjarjes, Inspektorati Policor i Kosovës pezulloi katër zyrtarë policorë të dyshuar për lidhje me grupin e Shkodrës, duke e thelluar më tej dyshimin për një rrjet fajdexhinjsh dhe lidhje me zyrtarë të korruptuar.