Gjykata e Lezhës ka vendosur që Francesk Mecaj, 30 vjeç, i arrestuar për trafik armësh drejt Italisë, të qëndrojë në burg pa afat, duke konfirmuar ligjshmërinë e arrestimit. Mecaj, me precedent penal në Itali, u ndalua pak ditë më parë në Malësi të Madhe, pas hetimeve për futjen e armëve në një valixhe me qëllim transportin drejt vendit fqinj.

Burime nga hetimet bëjnë të ditur se informacionet e para kanë ardhur nga Guardia di Finanza, që çuan në ndalimin e dy shoferëve të autobusit. Në bagazhet e tyre u gjetën armë zjarri dhe municione, ndërsa hetimet ndaj Mecaj janë zhvilluar edhe me përgjime.

Sipas hetimeve, më 16 korrik, Mecaj kishte kontaktuar administratorët e linjës me një numër italian, duke kërkuar transportin e një valixheje që sipas tij përmbante ushqime. Takimi u realizua në Milot, ku ai dorëzoi valixhen kundrejt 50 eurove, dhe më pas ajo u dorëzua në Itali tek një person i huaj.

Tre javë më vonë, Mecaj përsëriti veprimin, duke dorëzuar sërish valixhet në Milot. Këtë herë, autoritetet italiane ndaluan furgonin dhe kapën 5 armë zjarri tip kallashnikov, 5 krehëra dhe 356 fisheke. Në pranga përfunduan shoferët shqiptarë, Arian Deda dhe Eltion Muca, ndërsa autoritetet janë në kërkim të personit italian që priste dërgesën e armëve.

Mecaj mbetet nën akuzën për trafik ndërkombëtar armësh, ndërsa hetimet ndërkufitare mes Shqipërisë dhe Italisë vazhdojnë.