Barcelona ka blinduar një nga shtyllat e saj kryesore në mbrojtje. Klubi katalanas njoftoi këtë të premte rinovimin e kontratës me Jules Koundé deri në qershor 2030, duke siguruar shërbimet e francezit për tre sezone më shumë nga marrëveshja e mëparshme, që skadonte në vitin 2027.
26-vjeçari, që prej verës së vitit 2022 kur u transferua nga Sevilla për 50 milionë euro plus bonuse, është shndërruar në një element të pazëvendësueshëm në formacionin e Barcelonës. Fillimisht i vendosur në qendër të mbrojtjes, Koundé ka spikatur në rolin e mbrojtësit të djathtë, ku është kthyer në titullar absolut dhe ka zgjidhur një nga pozicionet më problematike për blaugranët.
Sezonin e kaluar (2024-25), francezi zhvilloi 53 ndeshje, duke humbur vetëm shtatë për shkak të një dëmtimi muskulor. Kontributi i tij ka qenë vendimtar për stabilitetin e prapavijës së skuadrës, ndërkohë që Drejtoria Sportive nuk e sheh më si prioritet afrimin e një mbrojtësi të djathtë.
Në ditët në vijim pritet që rinovimi të zyrtarizohet edhe me një aktivitet special, ku do të marrë pjesë presidenti Joan Laporta. Vetë Koundé e ka shprehur qartë se dëshira e tij ishte të vazhdonte te Barça:
“Unë dhe klubi kishim të njëjtën ide për të qëndruar. Jam shumë i lumtur, ndihem rehat me ekipin, me ambicien dhe jam shumë mirënjohës që jam në një institucion ku luftojmë për çdo titull çdo vit. Nuk kisha ndërmend të largohesha,” u shpreh ai.
Ky rinovim shihet si një hap strategjik nga Barcelona dhe trajneri Hansi Flick, i cili e konsideron Koundé një lojtar kyç në projektin e tij afatgjatë.
